Уни ҳозиргача ўз исми билан эмас, балки бутун дунёга машҳур қилган «Бобби» номи билан чақиришади. «Бобби» фильми эса гарчанд 34 йил олдин олинган бўлса-да, ҳануз ўз мавқеини йўқотгани йўқ. Фильмдаги қўшиқлар эса ҳамон севиб хиргойи қилинади. Бугун биз сизнинг талаб ва истакларингизга биноан «Бобби» ролини қойилмақом қилиб ижро этган актриса Димпл Кападиа ҳақида маълумот бериб ўтишни лозим топдик.
У
1955 йилнинг 8 июнида Мумбай шаҳрида таваллуд топган. Оилада икки
қизнинг каттаси Димпл ёшлигидан кинода суратга тушишни эмас, балки
модел бўлишни орзу қилган экан. Лекин бахтли тасодиф туфайли у
Ҳиндистоннинг буюк актёри Раж Капур назарига тушиб қолади. Капур
жаноблари уни ўзининг навбатдаги фильмига, яъни «Бобби»га таклиф этади.
Димпл эса бундай шахснинг таклифини рад этиш - ғирт аҳмоқлик эканлигини
тушуниб, фильмда рол ўйнайди. Буни қарангки, «Бобби» нафақат
Ҳиндистон, балки бутун дунёда яшин тезлигида машҳур бўлиб кетади.
Ундаги икки дебютант актёрлар Димпл ва Риши Капур халқнинг севимли
кумирларига айланишди. Фильмдаги Hum Tum Ek Kamra Hai қўшиғи эса
ёшларнинг энг севимли қўшиғи бўлди. Бу қўшиқ ҳамон ўз шуҳратини
йўқотгани йўқ.
ДИМПЛ ВА РАЖЕШ
«Бобби»
фильмидан сўнг Димпл Кападиа ҳинд киносининг ўша даврдаги қироли Ражеш
Кханна билан турмуш қуради ва икки қиз Твинкл ҳамда Ринкенинг бахтли
онасига айланади. Аммо бу турмуш узоққа чўзилмайди. Орадан ўн йил ўтиб
улар ажралишади. Ражешдан сўнг актриса бошқа турмушга чиқмайди ва ўзини
буткул қизлари тарбиясига бағишлаб, бир оз муддатга кинони тарк этади.
ДИМПЛ ВА КИНО
1985
йилда эса у яна мухлисларини шод айлаб, Риши Капур ҳамда Камол Ҳасан
билан биргаликда «Saagar» фильмида намоён бўлади. Кейин анча фурсатдан
сўнг режиссёр Фархан Ахтарнинг «Dil Chanta Hai» фильмида суратга
тушади. Ушбу фильмда Димпл коллеж ўқитувчиси Тара образини яратганди.
Ёдингизда бўлса, бу фильмда Тарани коллеж талабаси-Акшай Кханна севиб
қолади.
ДИМПЛ ФАРЗАНДЛАРИ ҲАҚИДА
Димплнинг
икки қизи ҳам актриса. Тўнғич фарзанди Твинкл Кханна аллақачон
Болливудда яхши актриса сифатида танилган. Кенжатойи Ринке эса театр
актрисаси. Димпл фарзандлари учун нафақат она, балки яқин дугона
ҳамдир. Уларни ҳеч қачон койимайди, кези келганда эса ўз маслаҳатини
аямайди. Актриса «Уйдан азизроқ нарсанинг ўзи йўқ» шиорига амал
қилади.
ДИМПЛ ВА УНИНГ ҲАМКОРЛАРИ
Жеки
Шрофф билан жуфтлигини «Ram Laxan» фильмида кўрганмиз. Амитабх Баччан,
Анил Капур, Винод Кханна, Камол Ҳасан ҳам Димплнинг ҳамкорлари
бўлишган. У ҳамкасблари орасида, айниқса, Винод Кханнани жуда ҳурмат
қилади.
Димпл унинг ўғли
Акшай Кханна билан ҳам суратга тушган. Ҳозирда Димпл Кападиа шамлар
ишлаб чиқарувчи фирмага бошчилик қилади.