2009/2010 йилги мавсумни Италиянинг «Милан» клубида ижара асосида ўтказадиган Дэвид Бекхэм чоршанба куни «Женоа»га қарши Италия чемпионати учрашувида дебют қилиши мумкин. Бу ҳақда «Reuters» хабар бермоқда.

Гап шундаки, «қизил-қоралар»нинг асосий ярим ҳимоячилари Кларенс Зеедорф ва Андреа Пирлолар кичик жароҳат олишган ҳамда генуяликларга қарши ўйинни ўтказиб юборишлари мумкин.

Бекхэм «Милан» учун муаммо саналган ўнг қанот ҳимоясида тўп суришга ҳам тайёр эканлигини маълум қилди. Лекин жамоа бош мураббийи Леонардо уни биринчи ўйиндаёқ бу нуқтада синаб кўрмаса керак.

«Милан»нинг бошқа бир янги аъзоси — Ўзбекистон ёшлар терма жамоасига қарши майдонга тушиб, Санжар Қувватов дарвозасига Гананинг иккинчи голини урган ва Мисрда бўлиб ўтган Жаҳон чемпионати ғолибига айланган Доминик Адия ҳали янги шароитларга кўникиб улгурмаган ва «Женоа»га қарши учрашувда майдонга тушмаслиги эҳтимоли катта.