Ҳар йили Москвада анъанавий тарзда ўтказиладиган МДҲ чемпионлари кубоги турнирига жамоа ўринбосарлари йўл оладиган бўлишди. Асосий таркиб футболчилари эса ўз қароргоҳларига 7 январда йиғилишади.

Ўйинчилар тиббий кўрикдан ўтишганидан сўнг 8 январь куни БААнинг Дубай шаҳрига ўқув-машғулотлар йиғини ўтказиш учун жўнаб кетишади.

Клубдан олинган хабарларга қараганда, бош мураббий Луиз Фелипе Сколарига Италиянинг «Ювентус» жамоасидан таклиф тушган. Лекин бразилиялик мутахассис уни рад этган. Сколари ва бошқа легионерларнинг пойтахтимизга 6 январь куни етиб келишлари кутилмоқда. «Қалдирғочлар» таркибида ўзгаришлар бўлиши мумкин. Маълумотларга қараганда, жорий йилда Осиё Чемпионлар Лигаси ғолибига айланган «Поханг Стилерс» клубидан ҳимоячи Ким Хюн Ил ва бразилиялик ҳужумчи Денилсонларнинг таркибга қўшилишлари эҳтимоли бор.