Дубайда дунёдаги энг баланд осмонўпар бинонинг очилиш маросими бўлиб ўтди. Дунё ОАВ яқингача Дубайда иқтисодий инқирознинг авж олаётгани, бу кетишда Дубай қарз ботқоғида қолиб кетиши ҳақида бот-бот гапирди. Кулгули ҳолни қаранг: куни кеча эса дунё ОАВ Дубай дунёни яна бир бор ҳайратга солгани ҳақида ҳайрат билан сўзлаяпти! БАА ҳукуматининг иқтисодий инқирозга ҳали бери енгилмаслигининг кичик исботини билдириши учун қилган ҳаракатими бу ё бошқа нарса, муҳими, улар бошлаган ишини уддалади! Burj Dubai — 1000 дан ортиқ хонадонлар, 160 кишилик меҳмонхона (хона дизайни билан эса Жорж Армани шуғулланган!) ва яна кўплаб мақсадларда фойдаланиш мумкин бўлган иншоотлардан иборат минора. 76-қаватда жойлашган бассейн эса ҳатто Холливуд юлдузларини ҳам ҳайратга солди. 158-қаватдаги гўзал ва ҳашаматли масжидда намоз ўқиш мумкин. Ушбу минорада 12 минг одам яшаши ва ишлаши учун мўлжаллаган.

Баландлиги 818 метр 55 см, 162 қаватдан иборат бу бинонинг ички кенглиги 1 миллион квадрат метрга етади! Қурилиш ишлари 5 йил олиб борилди ва 4 миллиард доллар сарфланди. Burj Dubaiда — 1000 та квартира бор. 49 та этаж офис сифатида фойдаланишга берилади. Яна пастки қаватларда Armani меҳмонхонаси жойлашган. Айтишларича, бу бино 20 миллиард долларлик йирик лойиҳанининг кичик бир кўриниши! Яқин келажакда Бурж Дубай қурилган янги даҳада 30 000 та квартира ва дунёдаги энг йирик савдо маркази қурилиши ҳам режалаштирилган!