O’z jamoasi bilan ishtirok etuvchilar uchun:

"Zakovat” Intellektual o’yinlarida ishtirok etish, stol atrofida o’tirib savollarga javob topish har bir bilimga chanqoq yoshlarning orzusi desak mubolag’a bo’lmaydi. Sizda ham shunday xohish-istak paydo bo’lgan bo’lsa, unda imkoniyatingiz bor. 6 kishidan iborat jamoa tuzing va haftaning har shanba kunlari soat 17:00 da "Kamolot” YIH Respublika binosida o’tkaziladigan reyting o’yinlariga tashrif buyuring. Reyting o’yinlarida yuqori o’rinlarni egallagan jamoalar esa Oliy Liga bahslarida ishtirok etish huquqini qo’lga kiritish uchun yaxshi imkoniyatga ega bo’ladilar. Demak shoshiling, biz sizni har hafta shanba kunlari saot 17:00 da "Kamolot” YIH Respublika binosida kutamiz.

"Zakovat” bilimdonlik kurslarida o’qish istagida bo’lganlar uchun:

"Zakovat” Intellektual o’yinlarining o’zagi ham, bezagi ham bu unda ishtirok etuvchi bilimdonlar hisoblanadi. Har yili yuzdan oshiq yoshlarni ilm egallashga qiziqtirishda, ularning bilim saviyasini oshirishda "Zakovat” klubi o’z hissasini qo’shib kelmoqda. Xususan, mana bir necha yildirki, O’zbekiston Milliy Universiteti Madaniyat Saroyi binosida klub zakovatli bo’lishni o’z oldiga maqsad qilib qo’ygan intiluvchan yoshlar uchun bilimdonlik kurslari tashkil etib, o’z faoliyatini muvaffaqiyatli olib bormoqda. Ushbu bilimdonlik kurslariga ko’rsatuv muallifi va boshlovchisi Abdurasul Abdullayevning shaxsan o’zi boshchilik qiladi. Siz bu yerda bir necha xildagi intellektual o’yinlarni o’ynashingiz, turli sohaga taaluqli bo’lgan bilimlarni egallashingiz va asosiysi bilimdonlik sir-sinoatlarini o’rganishingiz mumkin. "Zakovat” intellektual ko’rsatuvi orqali sizga tanish bo’lgan bir qancha yosh bilimdonlar aynan o’sha bilimdonlik kursi tarbiyalanuvchilari hisoblanishadi.

Agar sizda ham "Zakovat” bilimdoniga aylanish istagi paydo bo’lgan bo’lsa unda marhamat bizga murojaat etishingiz mumkin. Sizni haftaning har seshanba kunlari soat 15:00 da O’zbekiston Milliy Universiteti Madaniyat Saroyida kutib qolamiz. Bilimdonlikka ilk qadamlarni biz bilan qo’ying!